غرقانين

من طرف **Tammam21** السبت 11 أكتوبر 2008, 6:10 pm

من
مسرحية لوسيفر (من تأليفى وممنوع النقل قطعيا) .. اخ إخواته مسافرين بره وهو مكانش لاقى شغل فباع
بيت العيلة ولما اتنصب عليه والفلوس راحت منه افتكر أبوه وهو ماشى تايه فى
الشارع .. وبقى بيقول موال لطيف الأب (صورة للأب فى خياله):

غرقانين يابا .. يابا غرقانين

بعنا الماضى يابا .. وضاع تعب السنين

راح الحلم يابا .. راح فى غمضة عين

وإيه باقى يابا .. قلب باكى حزين

كنت لوحدى يابا .. هاصرف حلال منين

بحارب ناس ديابا .. بالغدر مليانين

قلبى وعقلى غلابة .. كانوا إخواتى فين ؟؟

فين إخواتى يابا .. سابونى بين نارين

نار ضمير بيقبل .. يسكت عشان قرشين

ونار فى عقلى تسأل .. لو أتوه أروح لمين ؟؟

دنيتنا يابا غابة .. بيموتوا الطيبين

وأنا ضعيف يابا .. أنا مخلوق من طين

مين هاروحله يابا .. يابا هاروح لمين ؟؟

يابا غرقانين

يابا غرقانين

كلمات الشاعر : Tammam21
مع تحياتى

من طرف **elnooreen** السبت 24 أكتوبر 2009, 11:17 am

حلو اوى ياتمام بس هو مين لوسيفر؟
الشعر ده بيوصف حال ناس متير واخواته يستاهلوا اللى هو عمله لانهم سابوه ومفكروش فيه
وهو اضطر طبعا مش مبرر انه يتصرف فى حاجة مش بتاعته بس ده حال مصريين كتير دايما بيكون عندهم قلة حيلة وضعف وبيكون سهل اوى التأثير عليهم وخصوصا لما تكون ظروفهم زى صاحبنا ده .
وشكرا ليك يا تمام

من طرف **elnooreen** السبت 24 أكتوبر 2009, 12:03 pm

لوسيفر (باللاتينية: Lucifer) كلمة لاتينية تعني "حامل الضوء" (من lux، lucis, بمعنى "ضوء"، و ferre, بمعنى "يحمل، يجلب") مصطلح فلكي روماني يشير إلى "نجم النهار"، كوكب الزهرة المضيء. كلمة لوسيفر ترجمة مباشرة للأصل الإغريقي الذي يعني "حامل الفجر"، والعبري هيليل الذي يعني "المضيء" ويحمل نفس المعنى الميثولوجي لسارق النار من أجل البشر، بروميثيوس.

وفي العقيدة المسيحية فان لوسيفر كان كبير الملائكة ولكنه أخذته الغرور والكبرياء فطرد من الجنة، ليتحول ويكون هو الشيطان.

عرفت مين هو لوسيفر.....

من طرف **elnooreen** السبت 24 أكتوبر 2009, 12:05 pm

بس انت ليه ذكرته هنا وايه علاقته بحكاية الشعر ؟
ايه المقصود منها ؟
وضح.............

من طرف **نور الشمس** السبت 24 أكتوبر 2009, 1:05 pm

الله الله الله
والله برافو عليك يا شاعر
بجد كلماتك جميله جدا
مشكووووووووووور
تحياااااااااتي

من طرف **Tammam21** الأحد 25 أكتوبر 2009, 2:42 am

لوسيفر أنا خدته من الأدب الإنجليزى وأقصد إبليس كبير الشياطين ورأس الأفعى
وتتحدث المسرحية على بعض أساليب شياطين الإنس والجن فى التأثير على بعض شخصيات البشر
وكيف تسيطر الحاجه على أحد الأخوة فيبيع رمز ما لديه لا يدرى ما أهميته .. وعندما يبيعه يعرف بعد فوات الأوان .. وتنتهى المسرحية بصراع مستمر مع الضمير الذى يتمثل فى صورة الأب

وتم عرض المسرحية وهى من تأليفى وإخراجى المسرحى
وأداء تمثيلى لفرقة البركان المسرحية بفاقوس
واشتركت بعرض نوادى مسرح الشباب
بهيئة قصور الثقافة
وحصلت على المركز الثامن

ميرسى على مرورك
ويارب تكون عجبتك
تحياتى

من طرف **ايمى** الأحد 25 أكتوبر 2009, 4:19 pm

دنيتنا يابا غابة .. بيموتوا الطيبين
وأنا ضعيف يابا .. أنا مخلوق من طين
مين هاروحله يابا .. يابا هاروح لمين ؟؟

بجد تسلم ايدك فعلا ده حال الكتير منا
بس الف خسارة انها تاخد المركز الثامن
لانها بجدجميلة وبتمس الواقع اللى احنا عايشينه

غرقانين

غرقانين

رد: غرقانين

رد: غرقانين

رد: غرقانين

رد: غرقانين

رد: غرقانين

رد: غرقانين